கே.ஜி.எஃப் படங்களின் பிரம்மாண்ட வெற்றிக்குப் பிறகு, சர்வதேச அளவில் எதிர்பார்ப்பை ஏற்படுத்திய நடிகர் யஷ் நடிப்பில் உருவாகியுள்ள 'டாக்சிக்' (Toxic) திரைப்படம் இன்று திரையரங்குகளில் வெளியானது. கீது மோகன்தாஸ் இயக்கத்தில் நயன்தாரா, கியாரா அத்வானி, தாரா சுதாரியா என நட்சத்திரப் பட்டாளமே இணைந்துள்ள இந்த அதிரடி கேங்ஸ்டர் கதைக்களம், வெளியானது முதலே திரையரங்குகளை அதிரவைத்து வருகிறது.
நான்கு ஆண்டுகளுக்குப் பிறகு யஷ் திரைக்குத் திரும்பியுள்ளதால் எழுந்த எதிர்பார்ப்பை முழுமையாகப் பூர்த்தி செய்யத் தவறிவிட்டது என்பதே பலரின் பார்வையாக உள்ளது. படத்தின் இரண்டாம் பாதியில் எல்லைமீறிய வன்முறைக் காட்சிகளும், தேவையற்ற ஆபாச காட்சிகளும் திணிக்கப்பட்டுள்ளதாக இணையத்தில் கடுமையான விமர்சனங்கள் எழுந்துள்ளன.
தெளிவில்லாத திரைக்கதையால் யஷின் தீவிர ரசிகர்களே கூட, "யஷின் மாஸ் காட்சிகளுக்காக வந்தோம்; ஆனால் ஏமாற்றமே மிஞ்சியது" எனத் தங்களது அதிருப்தியை வெளிப்படுத்தி வருகின்றனர்.
விமர்சனங்கள் ஒருபுறம் எதிர்மறையாக வந்தாலும், திரையரங்குகளில் வசூல் சூறாவளி ஓய்ந்தபாடில்லை. யஷின் கம்பீரமான திரைப் பிரசன்னமும், மாஸ் காட்சிகளும் ரசிகர்களைத் தியேட்டரை நோக்கி இழுத்து வருகின்றன. முதல் நாளிலேயே இந்திய அளவில் ரூ.60 கோடிக்கும் மேல் வசூலித்து சாதனை படைத்துள்ள 'டாக்சிக்', இந்தி மற்றும் கன்னடப் பதிப்புகளில் புதிய உச்சத்தைத் தொட்டுள்ளது.
இத்திரைப்படம், கர்நாடகா, மகாராஷ்டிரா மற்றும் குஜராத் மாநிலங்களில் அதிகாலை காட்சிகளிலேயே 80%-க்கும் அதிகமான இருக்கைகளை நிரப்பி அசத்தியுள்ளது. இன்று (புதன்கிழமை) வெளியீடான இத்திரைப்படம், அடுத்து வரும் வார இறுதி மற்றும் அரசு விடுமுறை நாட்களின் தயவால் உலகளவில் முதல் நாளிலேயே ரூ.100 கோடி வசூல் சாதனையை எட்டும் என எதிர்பார்க்கப்படுகிறது.