கலைஞரின் குரல் முதல் கோட்டையில் விஜய் வரை.. முதலமைச்சர்கள் தேசியக் கொடியேற்றிய வரலாற்று பின்னணி!

தமிழ்நாட்டின் முதலமைச்சராக பொறுப்பேற்ற பிறகு விஜய் பங்கேற்கும் முதல் சுதந்திர தின விழா இன்று சென்னை ஜார்ஜ் கோட்டை கொத்தளத்தில் நடைபெறுகிறது. தமிழ்நாடு அரசு சார்பில் நடைபெறும் விழாவில் காலை 8.45 மணிக்கு அவர் தேசியக் கொடியை ஏற்றுகிறார்.

சுதந்திர தின விழாவில் மாநில முதலமைச்சர்கள் தேசியக் கொடியை ஏற்றி வைக்கும் மரபு உருவானதற்குப் பின்னால் ஒரு முக்கியமான வரலாற்று நிகழ்வு உள்ளது. சுதந்திரம் அடைந்த ஆரம்பக் காலத்தில், டெல்லியில் குடியரசு தினத்தன்று குடியரசுத் தலைவரும், சுதந்திர தினத்தன்று பிரதமரும் தேசியக் கொடியை ஏற்றி வந்தனர். ஆனால் மாநிலங்களில் சுதந்திர தினம் மற்றும் குடியரசு தினம் ஆகிய இரண்டு நிகழ்வுகளிலுமே ஆளுநர்களே தேசியக் கொடியை ஏற்றி வந்தனர்.

உரிமைக்குரல் எழுப்பிய கலைஞர் கருணாநிதி

மக்களால் தேர்ந்தெடுக்கப்பட்ட பிரதமருக்கு தேசியக் கொடியை ஏற்றும் உரிமை இருக்கும்போது, மக்களால் தேர்ந்தெடுக்கப்படும் மாநில முதலமைச்சர்களுக்கும் அந்த உரிமை இருக்க வேண்டும் என்ற கோரிக்கையை முதன்முதலில் முன்வைத்தவர் தமிழ்நாட்டின் முன்னாள் முதலமைச்சர் மு. கருணாநிதி.

1969-ஆம் ஆண்டு சென்னை கோட்டை சுதந்திர தின விழாவில் உரையாற்றிய அவர், இக்கோரிக்கையை மத்திய அரசிடம் வலியுறுத்தினார். தொடர்ந்து கடிதங்கள் எழுதியும், பேரவையில் தீர்மானம் நிறைவேற்றியும் இதற்காகத் தொடர்ந்து குரல் கொடுத்து வந்தார்.

1974-ல் கிடைத்த வெற்றி

இக்கோரிக்கையை ஏற்றுக்கொண்ட அப்போதைய பிரதமர் இந்திரா காந்தி, 1974-ஆம் ஆண்டு மாநில முதலமைச்சர்களுக்குச் சுதந்திர தினத்தன்று தேசியக் கொடியேற்றும் உரிமையை வழங்கி ஆணையிட்டார். இதன்படி, குடியரசு தினத்தன்று ஆளுநரும், சுதந்திர தினத்தன்று முதலமைச்சரும் கொடியேற்றும் நடைமுறை தொடங்கியது.

1974-ஆம் ஆண்டு ஆகஸ்ட் 15 அன்று சென்னை புனித ஜார்ஜ் கோட்டையில் அன்றைய முதலமைச்சர் மு. கருணாநிதி முதன்முதலில் தேசியக் கொடியை ஏற்றி வைத்து வரலாறு படைத்தார். தமிழ்நாடு மட்டுமின்றி இந்தியாவின் அனைத்து மாநில முதலமைச்சர்களுக்கும் இந்த உரிமையைப் பெற்றுத் தந்த பெருமை அவருக்குச் சேர்ந்தது.

தமிழ்நாட்டின் கொடியேற்றிய முதலமைச்சர்கள்

1974-க்குப் பிறகு தமிழ்நாட்டில் பதவியிலிருந்த பல்வேறு முதலமைச்சர்கள் சுதந்திர தினத்தன்று புனித ஜார்ஜ் கோட்டை கொத்தளத்தில் தேசியக் கொடியை ஏற்றி வைத்துள்ளனர்:

மு. கருணாநிதி: 1974-76, 1989-91, 1996-2001, 2006-2011 ஆகிய காலகட்டங்களில் பலமுறை கொடியேற்றியுள்ளார்.

எம். ஜி. ராமச்சந்திரன் (எம்.ஜி.ஆர்): 1977 முதல் 1987 வரை தொடர்ந்து பத்து ஆண்டுகள் தேசியக் கொடியை ஏற்றி வைத்தார்.

ஜெ. ஜெயலலிதா: 1991-96, 2001-06, 2011-16 ஆகிய காலகட்டங்களில் கொடியேற்றினார்.

எடப்பாடி கே. பழனிசாமி: 2017 முதல் 2021 வரை சுதந்திர தின விழாக்களில் கொடியேற்றினார்.

மு. க. ஸ்டாலின்: 2021-ஆம் ஆண்டு முதல் தொடர்ந்து கொடியேற்றி வந்தார்.

இன்று (ஆகஸ்ட் 15, 2026) தமிழக முதலமைச்சராகப் பொறுப்பேற்ற பிறகு தனது முதல் சுதந்திர தின விழாவில் பங்கேற்கும் முதலமைச்சர் விஜய், சென்னை புனித ஜார்ஜ் கோட்டையில் காலை 8.45 மணிக்குத் தேசியக் கொடியை ஏற்றி வைக்கிறார்.

குடியரசு தினத்தில் கொடியேற்றிய முதல் முதலமைச்சர் ஓபிஎஸ்

சுதந்திர தினத்தில் முதலமைச்சர்கள் கொடியேற்றும் நடைமுறை இருக்கும் நிலையில், வழக்கமாக ஆளுநர் கொடியேற்றும் குடியரசு தினத்தன்று முதலமைச்சர் ஒருவர் கொடியேற்றிய நிகழ்வும் தமிழ்நாட்டில் நடந்துள்ளது.

2017 ஜனவரி 26 குடியரசு தினத்தன்று, அன்றைய பொறுப்பு ஆளுநர் சி. வித்யாசாகர் ராவ் மகாராஷ்டிரா விழாவில் பங்கேற்றதால், தமிழக வரலாற்றிலேயே முதல்முறையாக அன்றைய முதலமைச்சர் ஓ. பன்னீர்செல்வம் சென்னை மெரினா கடற்கரையில் தேசியக் கொடியை ஏற்றி வைத்தார் என்பது குறிப்பிடத்தக்கது.