அதிக சீட் கேட்கும் காங்கிரஸ்.. திமுக தலைவர் ஸ்டாலினுடன் ஐவர் குழு சந்திப்பு!

தமிழகத்தில் இன்னும் சில மாதங்களில் சட்டப்பேரவைத் தேர்தல் நடைபெறவிருக்கும் நிலையில், தி.மு.க.வுடனான கூட்டணிப் பேச்சுவார்த்தைக்காக அமைக்கப்பட்ட 5 பேர் கொண்ட காங்கிரஸ் குழு, இன்று (டிசம்பர் 3) சென்னை அண்ணா அறிவாலயத்தில் முதல்வரும் தி.மு.க. தலைவருமான ஸ்டாலினைச் சந்தித்துப் பேசியுள்ளது.

கூட்டணிப் பேச்சுவார்த்தைக்கான குழு விவரங்கள்

சட்டமன்றத் தேர்தலை முன்னிட்டு தி.மு.க.வுடன் கூட்டணிப் பேச்சுவார்த்தையைத் தொடங்கும் விதமாக, காங்கிரஸ் தலைமை இந்தக் குழுவை அமைத்துள்ளது. இந்தக் குழுவில் தமிழகத்திற்கான காங்கிரஸ் மேலிடப் பொறுப்பாளர் கிரிஷ் சோடங்கர் தலைமையில், தமிழக காங்கிரஸ் தலைவர் செல்வப்பெருந்தகை, அகில இந்திய காங்கிரஸ் செயலாளர்கள் சூரஜ் எம்.என். ஹெக்டே, நிவேதித் ஆல்வா, மற்றும் சட்டப்பேரவை காங்கிரஸ் தலைவர் ராஜேஷ் குமார் என 5 பேர் இடம் பெற்றுள்ளனர். இந்த குழு இன்று மரியாதை நிமித்தமாக திமுக தலைவர் ஸ்டாலினைச் சந்தித்துப் பேசியது. கடந்த தேர்தலைவிட வரும் தேர்தலில் காங்கிரஸ் கட்சி கூடுதல் தொகுதிகளைக் கேட்கவுள்ளதாகத் தகவல்கள் தெரிவிக்கின்றன.

சந்திப்புக்குப் பின் காங்கிரஸ் குழுவின் கருத்து

சந்திப்புக்குப் பின்னர் செய்தியாளர்களிடம் பேசிய தமிழக காங்கிரஸ் தலைவர் செல்வப்பெருந்தகை, "தமிழ்நாட்டில் இந்தியா கூட்டணி வலுவாக இருக்கிறது, இந்தக் கூட்டணி வெற்றி கூட்டணி" என்று தெரிவித்தார். மேலும், "காங்கிரஸ் தலைமை அமைத்த எங்கள் குழு இன்று மரியாதை நிமித்தமாக முதல்வரைச் சந்தித்தோம். தி.மு.க.வில் கூட்டணிப் பேச்சுவார்த்தைக்கான குழு அமைக்கப்பட்ட பிறகு எங்களுடைய பேச்சுவார்த்தை தொடங்கும்" என்று அவர் கூறினார்.