"அவர் ஒரு கத்துக்குட்டி": விஜய்யின் விமர்சனத்துக்கு முன்னாள் அமைச்சர் கடம்பூர் ராஜு பதிலடி!

பாஜகவுடனான கூட்டணி குறித்து தமிழக வெற்றிக் கழகத் தலைவர் விஜய் முன்வைத்த விமர்சனங்களுக்கு, அதிமுக முன்னாள் அமைச்சர் கடம்பூர் ராஜு கடுமையாகப் பதிலடி கொடுத்துள்ளார். "அதிமுக பற்றி விமர்சிக்க விஜய்க்குத் தகுதியே இல்லை" என்று அவர் சாடியுள்ளார்.

விஜய்யின் குற்றச்சாட்டு

நாமக்கல்லில் நடைபெற்ற மக்கள் சந்திப்புப் பரப்புரைக் கூட்டத்தில் இன்று பேசிய விஜய், அதிமுகவின் பாஜகவுடனான கூட்டணி குறித்துப் பேசியபோது, "பாசிச பாஜக அரசுடன் நாங்கள் ஒத்துப்போக மாட்டோம். திமுக அரசுபோல அன்டர்கிரவுண்ட் டீலிங் செய்யமாட்டோம். மூச்சுக்கு 300 முறை 'அம்மா அம்மா' என்று சொல்லிவிட்டு, மறைந்த முதல்வர் ஜெயலலிதா சொன்ன விஷயத்தை முற்றிலுமாக மறந்துவிட்டு, ஒரு பொருந்தாக் கூட்டணியை அமைத்துக் கொண்டு, 'தமிழ்நாட்டின் நலனுக்காக பாஜகவுடன் கூட்டணி வைத்துள்ளோம்' என்று சொல்லும் அதிமுக போல நாங்கள் இருக்க மாட்டோம்" என்று விமர்சித்திருந்தார்.

அதிமுக பதிலடி

இந்த நிலையில், தவெக தலைவர் விஜய்யின் விமர்சனத்துக்கு அதிமுக முன்னாள் அமைச்சர் கடம்பூர் ராஜு பதிலடி கொடுத்துள்ளார். செய்தியாளர்களை சந்தித்து பேசிய அவர், "பொன்விழா கண்ட அதிமுகவைப் பற்றி விமர்சிக்க விஜய்க்குத் தகுதியே இல்லை. அவர் ஒரு கத்துக்குட்டி.

எங்கள் கூட்டணியைப் பற்றிப் பேச அவருக்கு உரிமை இல்லை. அவரது வேலையை அவர் பார்க்கட்டும். விஜய் மாவட்டத்துக்கு ஒரு கூட்டம் செல்கிறார். ஆனால் எடப்பாடி பழனிசாமி தொகுதி வாரியாகச் செல்கிறார்" என்று அவர் கூறினார்.