சட்டம்- ஒழுங்கு டிஜிபி வெங்கடராமன் பொறுப்பேற்பு: நேரில் வாழ்த்து தெரிவித்த சென்னை காவல் ஆணையர்!

தமிழக காவல் துறையின் சட்டம்-ஒழுங்கு டிஜிபியாக இருந்த சங்கர் ஜிவால் நேற்று ஓய்வு பெற்றார். இதைத் தொடர்ந்து, தமிழக காவல் துறையின் புதிய பொறுப்பு டிஜிபியாக நிர்வாகப் பிரிவில் பணியாற்றி வந்த டிஜிபி வெங்கடராமன் நியமிக்கப்பட்டுள்ளார். இவர் நேற்று டிஜிபி அலுவலகத்தில் தனது பொறுப்புகளை முறைப்படி ஏற்றுக்கொண்டார். ஓய்வுபெற்ற டிஜிபி சங்கர் ஜிவால், வெங்கடராமனிடம் பொறுப்புகளை ஒப்படைத்தார்.

டிஜிபி அலுவலகத்தில் நடைபெற்ற இந்த நிகழ்வில், காவல் துறையின் உயர் அதிகாரிகள் பலரும் கலந்துகொண்டு புதிய பொறுப்பு டிஜிபிக்கு வாழ்த்து தெரிவித்தனர். ஆனால், சென்னை மாநகர காவல் ஆணையர் அருண் இந்த நிகழ்வில் கலந்துகொள்ளவில்லை. இது காவல் துறை வட்டாரங்களில் ஒருவித சலசலப்பையும், சர்ச்சையையும் ஏற்படுத்தியது. புதிய டிஜிபி பொறுப்பேற்கும் விழாவில் சென்னை காவல் ஆணையர் கலந்துகொள்ளாதது ஏன் என்ற கேள்விகள் எழுந்தன.

இந்தச் சர்ச்சைகளுக்கு முற்றுப்புள்ளி வைக்கும் விதமாக, இன்று சென்னை காவல் ஆணையர் அருண், பொறுப்பு டிஜிபி வெங்கடராமனை நேரில் சந்தித்தார். டிஜிபி அலுவலகத்திற்குச் சென்ற அருண், வெங்கடராமனுக்கு பூங்கொத்து கொடுத்து வாழ்த்து தெரிவித்தார். இந்தச் சந்திப்பு, காவல் துறைக்குள் நிலவிய கருத்து வேறுபாடுகள்குறித்த வதந்திகளுக்கு முற்றுப்புள்ளி வைத்ததாகக் கருதப்படுகிறது.

சென்னை காவல் ஆணையர் அருண், பொறுப்பு டிஜிபியை நேரில் சந்தித்து வாழ்த்து தெரிவித்ததன் மூலம், இருவரும் இணைந்து தமிழக சட்டம்-ஒழுங்கை திறம்பட நிர்வகிப்பார்கள் என்ற நம்பிக்கை வலுப்பெற்றுள்ளது.