தங்கம் விலை புதிய உச்சம்.. சவரனுக்கு ரூ.280 அதிகரிப்பு!

தங்கம் விலை கடந்த சில நாள்களாகத் தொடர்ந்து புதிய உச்சங்களை எட்டிவரும் நிலையில், இன்று ஒரு சவரன் தங்கம் ரூ. 94,880 என்ற புதிய உச்சத்தை தொட்டுள்ளது.

தங்கத்தின் இன்றைய விலை நிலவரம்

தங்கம் விலை தொடர்ந்து ஏற்ற இறக்கத்துடன் காணப்பட்டாலும், தினமும் காலை மற்றும் பிற்பகலில் விலையில் மாற்றம் ஏற்பட்டு வருகிறது. அதன் விளைவாக, தங்கம் விலை புதிய உயரத்தை நோக்கிச் செல்கிறது.

நேற்று (அக்.14), தங்கம் விலை அதிரடியாக உயர்ந்து, சவரனுக்கு ரூ. 1,960 அதிகரித்து, முதல் முறையாக ரூ. 94,600 என்ற புதிய உச்சத்தைத் தொட்டது. ஒரு கிராம் ரூ. 11,825-க்கு விற்பனையானது.

இந்த நிலையில், இன்று சென்னையில் ஆபரணத் தங்கத்தின் விலை கிராமுக்கு ரூ. 35 உயர்ந்து, ஒரு கிராம் ரூ. 11,860-க்கும், சவரனுக்கு ரூ. 280 உயர்ந்து, ஒரு சவரன் ரூ. 94,880-க்கும் விற்பனையாகி வருகிறது.

வெள்ளியின் விலை உயர்வு

தங்கத்தைப் போலவே வெள்ளி விலையும் தொடர்ந்து அதிகரித்து வருகிறது. நேற்று முன்தினம் ஒரு கிலோ வெள்ளி ரூ. 1 லட்சத்து 97 ஆயிரத்துக்கு விற்பனை செய்யப்பட்டது. நேற்று (அக்.14) ஒரு கிராம் ரூ. 9 அதிகரித்து ரூ. 206-க்கும், கிலோவுக்கு ரூ. 9 ஆயிரம் உயர்ந்து ரூ. 2 லட்சத்து 6 ஆயிரத்துக்கும் விற்பனையானது. இதன்மூலம், வெள்ளி விலையும் கிலோவுக்கு முதல்முறையாக ரூ. 2 லட்சத்தைக் கடந்து புதிய உச்சத்தைத் தொட்டது.

பண்டிகைக் காலத்தில் தங்கம் மற்றும் வெள்ளி விலை தொடர்ந்து வரலாறு காணாத அளவுக்கு உயர்ந்து வருவது வாடிக்கையாளர்களைக் கவலையடையச் செய்துள்ளது. சர்வதேச சந்தை மாற்றங்கள், டாலரின் மதிப்பு மற்றும் உலகளாவிய சந்தை நிலவரங்களே இந்த விலை உயர்வுக்குக் காரணம் என வல்லுநர்கள் தெரிவித்துள்ளனர்.