தமிழக டிஜிபி சங்கர் ஜிவால் ஓய்வு: பாரம்பரிய 'ரோப் புல்லிங்' மரியாதையை ஏற்க மறுப்பு!

தமிழக காவல்துறையின் 35 ஆண்டுக்கால சேவையைப் பூர்த்தி செய்த சட்டம் ஒழுங்கு டிஜிபி சங்கர் ஜிவால் ஐ.பி.எஸ், இன்று தனது பணியிலிருந்து ஓய்வு பெற்றார். பொதுவாக, இந்த உயரிய பொறுப்பிலிருந்து ஓய்வு பெறும் அதிகாரிகளுக்குக் காவல் துறை சார்பில் வழங்கப்படும் பாரம்பரியமான "ரோப் புல்லிங்" மரியாதையை அவர் ஏற்க மறுத்துவிட்டார்.

"ரோப் புல்லிங்" - காவல் துறையின் உயரிய மரபு

ஒவ்வொரு ஐ.பி.எஸ் அதிகாரிக்கும், சட்டம் ஒழுங்கு டிஜிபி பொறுப்பை அடைவது என்பது வாழ்நாள் கனவாகவும், லட்சியமாகவும் இருக்கும். இந்தப் பொறுப்பை அடையும் ஒரு சில அதிகாரிகளுக்கு, ஓய்வு பெறும் நாளில் "ரோப் புல்லிங்" என்ற சிறப்பு மரியாதை வழங்கப்படுவது காவல் துறையின் நீண்டகால மரபாக இருந்து வருகிறது.

ஆங்கிலேயர் காலத்தில், அதாவது 1874-ஆம் ஆண்டு, சென்னை மாகாணத்தின் காவல் துறைத் தலைவராகப் பணியாற்றிய ராபின்சன் என்பவர் ஓய்வு பெற்றபோது முதன்முதலில் இந்த மரியாதை வழங்கப்பட்டது. அன்று முதல், சட்டம் ஒழுங்கு டிஜிபி பொறுப்பிலிருந்து ஓய்வு பெறும் அனைத்து அதிகாரிகளுக்கும் இந்த மரபு தொடர்ந்து கடைப்பிடிக்கப்பட்டு வருகிறது.

இந்த மரியாதையின்போது, ஓய்வு பெறும் அதிகாரி மற்றும் அவரது மனைவியைக் காரில் அமர வைத்து, டிஜிபி, ஏடிஜிபி, ஐஜி போன்ற உயர் அதிகாரிகள் அனைவரும் கயிறுகளைப் பிடித்து, அந்தக் காரை இழுத்து அலுவலக வாசலுக்கு அழைத்துச் சென்று வழியனுப்புவார்கள். பல ஆண்டுகளாகக் காக்கிச் சீருடையில் பணியாற்றிய ஒரு அதிகாரி, இறுதியாக அதே சீருடையில் அலுவலகத்திற்கு வரும் கடைசித் தருணத்தை மகிழ்ச்சியானதாகவும், வாழ்நாள் முழுவதும் மறக்க முடியாததாகவும் மாற்றுவதே இந்த மரியாதையின் நோக்கம் எனக் கூறப்படுகிறது.

சங்கர் ஜிவாலின் வேண்டுகோள்

ஆனால், தனக்கு ஆடம்பரமான வழியனுப்பு விழாக்கள் வேண்டாமென ஓய்வு பெற்ற டிஜிபி சங்கர் ஜிவால், ஐபிஎஸ் அதிகாரிகளிடம் அன்புடன் கேட்டுக்கொண்டதால், இந்த முறை "ரோப் புல்லிங்" மரியாதை தவிர்க்கப்பட்டதாகத் தகவல்கள் தெரிவிக்கின்றன. இதன் மூலம், எளிமையின் எடுத்துக்காட்டாக அவர் திகழ்ந்துள்ளார்.

ஏடிஜிபி மற்றும் ஐஜி அந்தஸ்தில் உள்ள அதிகாரிகளுக்கும் அவர்கள் விரும்பினால் "ரோப் புல்லிங்" மரியாதை அளிக்கப்படுவதுண்டு என்பது குறிப்பிடத்தக்கது.