திமுக எம்.எல்.ஏ. கார் மோதி விவசாயி பலி: ஒரத்தநாடு போலீசார் விசாரணை!

தஞ்சை மாவட்டம், ஒரத்தநாடு அருகே தி.மு.க. மத்திய மாவட்டச் செயலாளரும், திருவையாறு சட்டமன்ற உறுப்பினருமான துரை சந்திர சேகரின் கார் மோதிய விபத்தில், கோவிந்தராஜ் என்ற விவசாயி சம்பவ இடத்திலேயே உயிரிழந்தார். இந்தச் சம்பவம் குறித்து ஒரத்தநாடு காவல்துறையினர் விசாரணை மேற்கொண்டு வருகின்றனர்.

விபத்து மற்றும் உயிரிழப்பு விவரங்கள்

தஞ்சை மாவட்டம், ஒரத்தநாடு அருகே உள்ள தென்னமநாடு நடுத்தெருவைச் சேர்ந்தவர் கோவிந்தராஜ் (வயது 50). இவருக்கு இரண்டு மகள்கள் மற்றும் ஒரு மகன் உள்ளனர். மகன் வெளிநாட்டில் வேலை செய்து வரும் நிலையில், கோவிந்தராஜ் சொந்த கிராமத்தில் விவசாயம் செய்து வந்தார். விவசாய வேலை காரணமாகத் தனது இருசக்கர வாகனத்தில் வயலுக்குச் சென்று கொண்டிருந்த கோவிந்தராஜ் மீது, ஒரத்தநாட்டில் இருந்து தஞ்சை நோக்கி வந்த தி.மு.க. மாவட்டச் செயலாளரும், சட்டமன்ற உறுப்பினருமான துரை சந்திரசேகரனின் கார் மோதியது. இந்த விபத்தில் கோவிந்தராஜ் சம்பவ இடத்திலேயே உயிரிழந்தார்.

காவல்துறையின் நடவடிக்கை

விபத்து குறித்துத் தகவல் கிடைத்ததும், ஒரத்தநாடு காவல்துறையினர் சம்பவ இடத்திற்கு விரைந்து வந்தனர். உயிரிழந்த கோவிந்தராஜின் உடலைக் கைப்பற்றிய காவலர்கள், பிரேதப் பரிசோதனைக்காக ஒரத்தநாடு அரசு மருத்துவமனைக்கு அனுப்பி வைத்தனர். விபத்தை ஏற்படுத்திய துரை சந்திரசேகரனின் கார் பறிமுதல் செய்யப்பட்டு ஒரத்தநாடு காவல் நிலையத்தில் வைக்கப்பட்டுள்ளது. இந்தச் சம்பவம் தொடர்பாக ஒரத்தநாடு காவல்துறையினர் வழக்குப்பதிவு செய்து விசாரணை மேற்கொண்டு வருகின்றனர்.