அமராவதி உணவகத்தில் 2-வது நாளாக ED சோதனை: சட்டவிரோதப் பணப் பரிமாற்றம் குறித்து தீவிர ஆய்வு!

சென்னை டிடிகே சாலையில் உள்ள பிரபலமான அமராவதி உணவகம் மற்றும் அதன் உரிமையாளர்களின் வீடுகளில் அமலாக்கத்துறை (Enforcement Directorate - ED) நடத்தி வரும் அதிரடிச் சோதனை இன்றும் இரண்டாவது நாளாகத் தொடர்கிறது.

சட்டவிரோதப் பணப் பரிமாற்றம் (Money Laundering) தொடர்பான புகார்களின் அடிப்படையில், அமராவதி உணவகத்தின் உரிமையாளர்களான நைனா ரெட்டி, அல்லாரெட்டி தருண் ரெட்டி மற்றும் நிவ்ருதி ரெட்டி ஆகியோரின் வீடுகளிலும் சோதனை நடத்தப்பட்டு வருகிறது. ஆழ்வார்பேட்டை மகாதேவன் அடுக்குமாடிக் குடியிருப்பில் உள்ள இவர்களது வீடுகளில் அமலாக்கத்துறை அதிகாரிகள் நேற்று முதலே தீவிரச் சோதனையில் ஈடுபட்டுள்ளனர்.

இவர்களின் வங்கிக் கணக்குகளில் சில பணப் பரிவர்த்தனைகள் சந்தேகப்படும்படி இருப்பதாகக் கூறப்படுவதால், சட்டவிரோதப் பணப் பரிமாற்றத்தில் ஈடுபட்டிருக்கலாம் என்ற கோணத்தில் இந்தச் சோதனை நடத்தப்படுகிறது.

உணவகத்தின் நிதிப் பரிவர்த்தனை ஆவணங்கள், கணக்கு வழக்குப் பதிவுகள் மற்றும் வங்கிப் பரிவர்த்தனைகள் உள்ளிட்ட முக்கிய விவரங்கள் குறித்து அதிகாரிகள் தீவிரமாக ஆய்வு செய்து வருகின்றனர். தொடர்ந்து இரண்டு நாட்களாக நடைபெற்று வரும் இந்தச் சோதனையின் முடிவில், முக்கிய ஆவணங்கள் ஏதேனும் கைப்பற்றப்படுமா என்ற விவரம் வெளியாகும் என எதிர்பார்க்கப்படுகிறது. இந்த நீடித்த சோதனை, சென்னை தொழில் மற்றும் வணிக வட்டாரத்தில் பெரும் பரபரப்பை ஏற்படுத்தியுள்ளது