வர்த்தகப் போரின் புதிய பரிணாமம்: நாசாவில் சீனர்களுக்குத் தடை!

அமெரிக்காவுக்கும் சீனாவுக்கும் இடையே ஏற்கனவே நீடித்துவரும் வர்த்தகப் போர், தற்போது விண்வெளி ஆராய்ச்சித் துறை வரை விரிவடைந்துள்ளது. இதன் ஒரு பகுதியாக, அமெரிக்காவின் நாசா விண்வெளி ஆராய்ச்சி மையத்தில் சீனர்கள் பணியாற்றத் தடை விதிக்கப்பட்டுள்ளது. இந்த அதிரடி முடிவு, சர்வதேச அரசியல் மற்றும் தொழில்நுட்ப வட்டாரங்களில் பெரும் பரபரப்பை ஏற்படுத்தியுள்ளது. நாசாவின் இந்த நடவடிக்கை, விண்வெளித் துறையில் சீனாவின் வளர்ந்து வரும் ஆதிக்கத்திற்கு பதிலடி கொடுக்கும் ஒரு முயற்சியாகப் பார்க்கப்படுகிறது.

நாசாவின் உள்விவகாரங்கள் தொடர்பான அறிவிப்பில், சீன நாட்டவர்களுக்கு, நாசாவின் வளாகங்கள், ஆய்வுக் கூடங்கள், தரவுகள் மற்றும் பிணையங்களுக்கு (network) அனுமதி மறுக்கப்பட்டுள்ளது. இதன் மூலம், பாதுகாப்புக் காரணங்களுக்காக இந்த நடவடிக்கை எடுக்கப்பட்டதாக நாசா குறிப்பிட்டுள்ளது. கடந்த சில ஆண்டுகளாக, விசா வைத்திருக்கும் சீனர்கள் ஒப்பந்ததாரர்களாகவோ அல்லது மாணவர்களாகவோ நாசாவின் ஆராய்ச்சித் திட்டங்களில் பங்களித்து வந்தனர். ஆனால், தற்போது இந்த நிலைப்பாட்டிலிருந்து விலகி, முழுமையான தடை விதிக்கப்பட்டுள்ளது.

இந்தத் தடைக்குப் பின்னணியில், அமெரிக்காவும் சீனாவும் விண்வெளிப் பந்தயத்தில் கடுமையாகப் போட்டியிடுவது முக்கியக் காரணமாகக் கருதப்படுகிறது. நிலவுக்கு மனிதர்களை அனுப்புவது, செவ்வாய் கிரக ஆய்வு எனப் பல துறைகளில் இரு நாடுகளும் மும்முரமாக உள்ளன. குறிப்பாக, சீனாவைப் பொறுத்தவரை அதன் விண்வெளித் திட்டங்கள் மிகவும் துல்லியமாகவும், திட்டமிட்ட நேரத்திலும் நிறைவேற்றப்படுவதாகக் கூறப்படுகிறது. இதனால், அமெரிக்கா தனது விண்வெளித் துறையில் தனக்குள்ள ஆதிக்கத்தை உறுதிப்படுத்த இந்த நடவடிக்கையை எடுத்துள்ளதாக அரசியல் பார்வையாளர்கள் கருத்துத் தெரிவிக்கின்றனர். இந்த விவகாரம் இரு நாடுகளின் வர்த்தகப் போரில் ஒரு புதிய பரிமாணத்தை ஏற்படுத்தியுள்ளது.