லைகா புரொடக்ஷன்ஸ் வழக்கு: நடிகர் விஷாலின் மனு தள்ளுபடி.. நீதிமன்றம் அதிரடி!

லைகா புரொடக்ஷன்ஸ் நிறுவனத்திடம் பெற்ற கடனைத் திருப்பிச் செலுத்துவது தொடர்பான வழக்கில், நடிகர் விஷாலுக்குப் பின்னடைவு ஏற்பட்டுள்ளது. நீதிமன்ற உத்தரவின்படி டெபாசிட் செய்ய வேண்டிய தொகைக்கு அவகாசம் கோரிய அவரது கோரிக்கையை நீதிமன்றம் தள்ளுபடி செய்துள்ளது.

வழக்கின் பின்னணி

லைகா நிறுவனத்திடம் பெற்ற ரூ. 21 கோடியே 29 லட்சம் கடனை, 30 சதவீத வட்டியுடன் திருப்பிச் செலுத்த வேண்டும் எனத் தனி நீதிபதி முன்னதாக உத்தரவிட்டிருந்தார். இந்த உத்தரவை எதிர்த்து விஷால் தரப்பில் மேல்முறையீடு செய்யப்பட்டது. வழக்கை விசாரித்த இரு நீதிபதிகள் அமர்வு, தனி நீதிபதியின் உத்தரவுக்கு இடைக்காலத் தடை விதித்ததோடு, பாதுகாப்புத் தொகையாக ரூ. 10 கோடியை நீதிமன்றத்தில் டெபாசிட் செய்ய விஷாலுக்கு உத்தரவிட்டிருந்தது.

அவகாசம் கோரிய மனு

தங்கள் தரப்பு வங்கிக் கணக்குகள் முடக்கப்பட்டுள்ளதால், பணத்தைத் திரட்ட கால அவகாசம் தேவைப்படுவதாகக் கூறி, ரூ. 10 கோடியைத் தாக்கல் செய்ய 6 வார கால அவகாசம் வழங்கக் கோரி விஷால் தரப்பில் மனுத்தாக்கல் செய்யப்பட்டது. இந்த மனு நீதிபதிகள் சி.வி. கார்த்திகேயன் மற்றும் குமரேஷ் பாபு அமர்வு முன்பு விசாரணைக்கு வந்தது.

நீதிமன்றத்தின் அதிரடித் தீர்ப்பு

விஷால் தரப்பு வாதங்களைக் கேட்ட நீதிபதிகள், அவகாசம் கோரி மனுத்தாக்கல் செய்யப்பட்டு ஏற்கனவே எட்டு வாரங்கள் கடந்துவிட்டதைச் சுட்டிக்காட்டினர். எனவே, மேற்கொண்டு கால அவகாசம் வழங்க முடியாது எனக் கூறி, விஷாலின் மனுவைத் தள்ளுபடி செய்து நீதிபதிகள் உத்தரவிட்டனர்.