மனைவி பிரிந்து சென்றதால் ஆத்திரம்.. மூன்று குழந்தைகளைக் கழுத்தறுத்துக் கொன்ற தந்தை!

பட்டுக்கோட்டை அருகே மனைவியின் பிரிவைத் தாங்க முடியாத கணவன், தனது மூன்று குழந்தைகளைக் கழுத்தறுத்துக் கொன்ற சம்பவம் பெரும் பரபரப்பை ஏற்படுத்தியுள்ளது.

சம்பவத்தின் பின்னணி

தஞ்சை மாவட்டம், பட்டுக்கோட்டை அடுத்த மதுக்கூர் அருகே உள்ள பெரியகோட்டை, கோபாலசமுத்திரம் பகுதியைச் சேர்ந்தவர் வினோத்குமார் (38). புகைப்படக் கலைஞராகவும், டிரைவராகவும் பணியாற்றி வந்த இவர், தற்போது மதுக்கூர் வடக்கு பெரமையா கோவில் அருகே வசித்து வருகிறார். இவரது மனைவி நித்யா (35). இவர்களுக்கு ஓவியா (11), கீர்த்தி (8) என்ற இரு பெண் குழந்தைகளும், ஈஸ்வர் (5) என்ற ஒரு ஆண் குழந்தையும் உள்ளனர்.

வினோத்குமாருக்கும் அவரது மனைவி நித்யாவுக்கும் இடையே ஏற்பட்ட கருத்து வேறுபாடு காரணமாக, ஆறு மாதங்களுக்கு முன்பு நித்யா, மூன்று குழந்தைகளையும் வினோத்குமாரிடம் விட்டுவிட்டு வேறு ஒரு நபருடன் உறவில் இருந்ததாக கூறப்படுகிறது.

குழந்தைகளைக் கொன்ற கொடூரம்

மனைவியைப் பிரிந்த நிலையில் மன வேதனையில் இருந்த வினோத்குமார், கடந்த சில நாட்களுக்கு முன்பு நித்யாவைச் சந்தித்து, மீண்டும் தன்னுடன் வந்து வாழுமாறு அழைத்துள்ளார். ஆனால், அவர் வர மறுத்ததால் வினோத்குமார் கடும் கோபமடைந்ததாகத் தெரிகிறது.

இந்தக் கோபத்தில், நேற்று மாலை (அக். 9) வீட்டில் இருந்த தனது மூன்று குழந்தைகளுக்கும் பலகாரங்கள் வாங்கி கொடுத்துச் சாப்பிடச் சொல்லியுள்ளார். குழந்தைகள் பலகாரங்களைச் சாப்பிட்டுக் கொண்டிருக்கும் போதே, வினோத்குமார் அவர்கள் மூவரின் கழுத்தையும் அறுத்துக் கொன்றதாகக் கூறப்படுகிறது.

இந்தக் கொடூரச் செயலைச் செய்த பின், வினோத்குமார் மதுக்கூர் காவல் நிலையத்தில் சரணடைந்தார். இச்சம்பவம் குறித்து போலீசார் தீவிர விசாரணை மேற்கொண்டு வருகின்றனர். ஒரே குடும்பத்தைச் சேர்ந்த மூன்று குழந்தைகள் கொல்லப்பட்ட சம்பவம் அப்பகுதியில் பெரும் சோகத்தையும், அதிர்ச்சியையும் ஏற்படுத்தியுள்ளது.