தேவா பத்தி தெரிஞ்சிருந்தும்.. ‘கூலி’ படத்தின் ட்ரெய்லர் வெளியானது!

ரஜினிகாந்த் நடிப்பில், லோகேஷ் கனகராஜ் இயக்கத்தில் உருவாகியுள்ள 'கூலி' படத்தின் ட்ரெய்லர் இன்று வெளியாகி இணையத்தில் வைரலாகி வருகிறது. இந்தப் படத்தின் பிரம்மாண்ட இசை வெளியீட்டு விழா சென்னை நேரு உள் விளையாட்டு அரங்கத்தில் நடைபெற்று வரும் நிலையில், ட்ரெய்லர் வெளியாகி ரசிகர்களிடையே பெரும் எதிர்பார்ப்பை எகிற வைத்துள்ளது.

'கூலி' திரைப்படத்தில் ரஜினிகாந்துடன் நாகார்ஜுனா, உபேந்திரா, சோபின் சாஹிர், சத்யராஜ், ஸ்ருதிஹாசன், பூஜா ஹெக்டே எனப் பல முன்னணி நட்சத்திரங்கள் நடித்துள்ளனர். குறிப்பாக, பாலிவுட் சூப்பர் ஸ்டார் அமீர்கான் சிறப்பு தோற்றத்தில் நடித்திருப்பது படத்தின் மீதான எதிர்பார்ப்பை மேலும் அதிகரித்துள்ளது. சன் பிக்சர்ஸ் தயாரிப்பில், அனிருத் இசையமைத்துள்ள இந்தப் வரும் ஆகஸ்ட் 14 ஆம் தேதி திரையரங்குகளில் வெளியாகவுள்ளது.

பாடல்களின் அமோக வரவேற்பு

படத்தின் முதல் பாடலான 'சிக்கிடு வைப்..' டி. ராஜேந்தரின் வித்தியாசமான குரலில், அனிருத் மற்றும் ராப் பாடகர் அறிவு இணைந்து பாடி, அறிவு வரிகள் எழுதியிருந்த நிலையில், வெளியாகி இணையத்தில் தாறுமாறாக வைரலானது. இதைத்தொடர்ந்து, நடிகை பூஜா ஹெக்டேவின் துள்ளலான நடனத்தில் வெளியான 'மோனிகா..' பாடலும் இணையத்தில் ட்ரெண்டாகி அமோக வரவேற்பைப் பெற்றது.

இந்தப் பாடல்களின் வெற்றி படத்தின் மீதான எதிர்பார்ப்பை உச்சத்திற்குக் கொண்டு சென்ற நிலையில், படத்தின் ட்ரெய்லர் ஆகஸ்ட் 2 ஆம் தேதி வெளியாகும் என படக்குழு முன்னரே அறிவித்திருந்தது.

வைரலாகும் 'கூலி' ட்ரெய்லர்

இந்த நிலையில், இன்று வெளியான 'கூலி' ட்ரெய்லரில், நாகார்ஜுனா, சோபின் சாஹிர், அமீர்கான், ஸ்ருதிஹாசன் ஆகியோர் இடம்பெறும் காட்சிகள் முதலில் வர, அதன்பின் ரஜினியின் மாஸான என்ட்ரி காண்போரைக் கவரும் வகையில் அமைந்துள்ளது. அதிரடி சண்டை காட்சிகளில் நடிகர் ரஜினி வழக்கம் போல அசத்தியிருக்கிறார். ட்ரெய்லரின் இறுதியில், 'பாட்ஷா' படத்தில் ரஜினி சிகரெட் பிடிக்கும் காட்சி இடம்பெற்றிருப்பது ரசிகர்களுக்கு ஒரு மிகப்பெரிய இன்ப அதிர்ச்சியாக அமைந்துள்ளது. இந்த ‘ட்ரெய்லர்’ தற்போது இணையத்தில் வைரலாகும் நிலையில், 'கூலி' படத்தின் மீதான எதிர்பார்ப்பை மேலும் பல மடங்கு உயர்த்தியுள்ளது.