வேறு சமூக இளைஞருடன் காதல்.. கொடூர செயலில் ஈடுபட்ட தந்தை!

வேறு சமூகத்தைச் சேர்ந்த இளைஞரை காதலித்ததால் ஆத்திரமடைந்த ஒரு தந்தை, தனது மகளைக் கொலை செய்து, அதைத் தற்கொலை என நம்பவைக்க நாடகமாடியுள்ள சம்பவம் கர்நாடக மாநிலத்தில் பெரும் அதிர்ச்சியை ஏற்படுத்தியுள்ளது.

சம்பவத்தின் பின்னணி

கலபுரகி மாவட்டம், மேலகுண்டா கிராமத்தில் கடந்த 28 ஆம் தேதி அன்று 18 வயது இளம் பெண் ஒருவர் தற்கொலை செய்துகொண்டதாகவும், அவருக்கு உடனடியாக இறுதிச் சடங்குகள் செய்யப்பட்டதாகவும் போலீசாருக்கு ரகசிய தகவல் கிடைத்துள்ளது. இந்த மரணத்தில் சந்தேகம் இருப்பதாகக் தகவல் வந்ததை அடுத்து, உடனடியாக சம்பவ இடத்திற்கு விரைந்த போலீசார் விசாரணை மேற்கொண்டனர்.

கொடூரக் கொலை மற்றும் தற்கொலை நாடகம்

விசாரணையில், அப்பெண்ணின் தந்தை சங்கர்தான் இந்தக் கொடூரச் செயலைச் செய்தது தெரியவந்தது. அவருக்கு ஐந்து மகள்கள் இருந்ததால், தனது மக்கள் வெறும் சமூகத்தை சேர்ந்த நபரை திருமணம் செய்தால் மற்ற மகள்களின் எதிர்காலத்தைத் பாதிக்கும் என அவர் அஞ்சியுள்ளார். இதனால், தனது மகள் காதலைக் கைவிட்டு படிப்புக்கு முக்கியத்துவம் கொடுக்க வேண்டும் என்று உறவினர்கள் மூலமாக வற்புறுத்தியுள்ளார். ஆனால், அந்தப் பெண் தனது முடிவில் உறுதியாக இருந்துள்ளார்.

இதனால் ஆத்திரமடைந்த சங்கர், தனது மகளின் கழுத்தை நெரித்துக் கொலை செய்துள்ளார். பின்னர், அதைத் தற்கொலை போல் காட்ட, அவரது வாயில் பூச்சி மருந்தை ஊற்றியுள்ளார். இதை நம்பிய கிராம மக்களும், அந்தப் பெண்ணின் இறுதிச் சடங்குகளில் கலந்துகொண்டனர்.

விசாரணை மற்றும் கைது

இந்தக் கொலை தொடர்பாகக் காவல்துறை உடனடியாக வழக்குப் பதிவு செய்து, சங்கரைக் கைது செய்தது. கொலை மற்றும் தடயங்களை அழித்தல் ஆகிய பிரிவுகளின் கீழ் வழக்குகள் பதிவு செய்யப்பட்டுள்ளன. மேலும், தடயவியல் நிபுணர்கள் வரவழைக்கப்பட்டு, ஆதாரங்கள் சேகரிக்கப்பட்டுள்ளன. இந்தக் கொலையில் சங்கரின் உறவினர்களுக்கும் தொடர்பு இருக்கலாம் எனச் சந்தேகிக்கப்படுவதாகவும், அவர்கள் குற்றவாளிகள் என நிரூபிக்கப்பட்டால் கைது செய்யப்படுவார்கள் எனவும் காவல் ஆணையர் சரணப்பா தெரிவித்தார். இந்த வழக்கு தொடர்பாக தொடர்ந்து விசாரணை நடைபெற்று வருகிறது.